الحلول النقدية والاقتصادية: فلسفة صانع القرار

الحلول النقديّة تصنع مشاكل اقتصاديّة. والمشاكل النقديّة - لا تحلّها إلّا الحلول الاقتصاديّة.

الحلول النقديّة زيّ إيه ؟!

• 1 - زيّ طباعة الفلوس: تزيد كمية الورق المتداول لحل المشاكل الرقمية الفورية.
• 2 - زيّ رفع سعر الفائدة في البنوك: عشان الناس تحطّ فلوسها في البنوك - فالحكومة تلاقي سيولة لتشغيل مشاريعها، والناس ما يبقاش معاها فلوس - فيقلّلوا الشراء - فالأسعار تنزل.
• 3 - زيّ الاقتراض من الخارج: سد العجز الفوري عبر الاستدانة الخارجية.
• 4 - زيّ رفع الفائدة على الودائع الدولاريّة: لاستجلاب المال الساخن (الخواجات الأجانب).

دي حلول نقديّة. اللي حطّ الحلول دي هو واحد بيفهم في الفلوس من حيث كونها فلوس، من حيث كونها ورق، من حيث كونها رقم.

دي الحلول النقديّة. الحلول النقديّة رغم إنّها من حيث وجهة نظر الأرقام بتحلّ المشكلة - إلّا إنّها بتصنع مشاكل اقتصاديّة:

الموضوع يشبه إنّك عاوز تبني فيلّا - فتروح تجيب مهندس مدنيّ يبنيها لك - مش مهندس معماريّ. المهندس المدنيّ مش هيقول لك لأ - وهيعمل لك فيلا فعلا. بسّ هتكتشف بعد كده إنّك عايش في علب كبريت جنب بعضها، إنّ الشمس مش بتشرق على غرفة النوم، وإنّ الشمس بتغرب على الصالة - فتلاقي الصالة بالليل نار، وإنّ الهوا بياخد روايح المطبخ والحمام يدخلها الفيلّا! وإنّ ما فيش بلكونات! دا الفرق بين المهندس المدنيّ والمهندس المعماري. ودا اللي بتكتشفه لمّا تجيب واحد بانكير يحلّ مشكلة اقتصاديّة.

إزاي يفكر الشخص الاقتصادي الحقيقي؟

الشخص الاقتصاديّ لمّا تقول له عاوزين فلوس عشان نعطي مرتّبات لموظّفين الحكومة - هيقول لك: (وليه الناس أساسا تفكّر تكون موظّفين حكومة؟! ليه معظم الناس ما بتفكّرش تشتغل بنفسها - وتعمل مشاريعها الخاصّة؟!) ويشتغل على كده. بعد 10 سنين - تلاقي المشاريع الخاصّة بقت بتكسّب الناس أحسن من وظائف الحكومة - فالموظّفين قلّوا - فما بقيناش محتاجين أساسا نضغط نفسنا في طباعة فلوس للحكومة عشان تدفع مرتّبات.

الشخص الاقتصاديّ لمّا تقول له عاوزين فلوس نعطيها للمقاولين - هيقول لك: (وليه نعطي المقاولين فلوس؟ ما تيجوا يا مقاولين تدخلوا معايا بنسبة في أرباح المشاريع دي!!) وييحسبها للمقاولين بالورقة والقلم - يطلع المقاول من مصلحته إنّه يسيب جزء من أجره في المشروع ده - مقابل حصّة منّه. فيبقى أنا بنيت لكوا المباني اللي إنتوا عاوزينها - وما دفعتش حاجة! (تخيّل تبقى راكب مع خالك الحاج سعيد المقاول في كارتة طريق ويدفع 10 جنيه ويضحك عشان له 10% من إيراد الطريق لمدّة 10 سنين!).

الشخص الاقتصاديّ هيقلّل الفايدة في البنك - فاللي ليه فلوس في البنك يلاقيها بتخسر - فيسحبها ويعمل بيها مشروع - يشغّل فيه ناس، فالناس دي تحلّ من على دماغ الحكومة كموظّفين أو مستحقّين للدعم.

الشخص الاقتصاديّ لمّا تقول له عاوز دولارات - مش هيروح يجيب ناس تحطّ ودائع دولاريّة في البنوك - ولكن هيجيب ولاده المغتربين يقول لهم أنا خصّصت ليكم أراضي بالدولار - فولاده يبعتوا الدولارات من برّا ويشتروا بيها أرض هنا، فيبقى دخّل الدولارات للاحتياطيّ - ومش ملزم بأيّ حاجة!

ولو شخص أجنبيّ عاوز ييجي بدولاراته - ييجي - بسّ ما يحطّهاش في بنك، ييجي يحطّها في مصنع أو مزرعة، فيشغّل لي ناس، وأقول له إنتا تدفع المرتّبات بالدولار في رصيد الموظّفين في البنك، الموظّف يروح يسحب مرتّبه من المكنة آخر الشهر - يلاقي طالعاله جنيهات، بينما الدولارات ذهبت في دهليز سرّيّ إلى البنك المركزيّ! دي أجور صرفناها للعمّال خلاص، ولمّا امريكا ترفع الفايدة - الخواجة يلاقي نفسه مش عارف يسحب فلوسه من البنك - لإنّها أساسا مش في البنك! دي بقت مصنع أو مزرعة.

الشخص الاقتصاديّ لمّا تقول له مش لاقيين دولار نستورد بيه مستلزمات إنتاج؟ هيقول لك: (وليه نستورد مستلزمات إنتاج أصلا؟! ما نصنّعها إحنا؟! اللي له إيد وراس - يعمل اللي يعملوه الناس). فتلاقي نفسك بعد كده ما فيش عندك مشكلة نقديّة أساسا في توفير سيولة دولاريّة للاستيراد.